(圖片取自郭富城Facebook專頁)
無可否認，郭富城演唱會的確叫人期待！
不過最近有討論區口痕友話，佢今次演唱會銷情唔及以往咁好，傳出賣唔晒飛的情況，叫好不叫座的最佳例子！
點解會咁？郭富城喎？四大天王喎？
不過四大天王係90年代產物，得罪講句都有20年歷史，如過要睇佢演唱會，廿年來都睇過，金曲都仲係個幾首！加上當年廿歲粉絲今時今日都四十出頭，無復當年勇去追車、睇足15場都唱這歌！
(圖片取自郭富城Facebook專頁)
先講傳媒，唔係黑材料唔出，都算！搵唔到黑材料就作料，一個大話講十次就會係真話，點可能唔死？寫死咗一個又一個，未死嘅又比人揭左秘婚、吸毒、拍拖、生仔⋯⋯ 曾幾何時一本雜誌成本都沒介紹過節目、音樂，全部都係爆料！
觀眾都唔知你班人忙緊咩，自然睇韓星啦！
而社交平台興起，藝人終於有個檔口講下自己首歌，仲使靠你枝筆？真你睬你都傻！
今時今日紙媒下沉，傳媒先話唇亡齒寒？你斷咗好多人衣食、亡咗好多個事業了！何況，扭曲咗個市場，就點都救唔返，呢個係叫「攬炒」！
政府就仲衰，永遠都係後知後覺，盜版、下載都係熱潮過咗先做嘢！每年都話投放幾千萬電影、音樂做資助！
算吧啦！根本唔知米貴！一套戲收到過3千萬，除時都要投資1千萬！你拆細資助咩？又唔夠用；大份又唔知比邊個好！
現時香港咁多大白象工程延誤，其實每年跌1%去資助娛樂事業，都有成10億！搞大騷、開大片、系統訓練、海外推廣、政府帶頭搞頒獎禮等等，其實唔使我教，抄韓國都得，不過講得佢哋係後知後覺，算吧啦！
(圖片取自郭富城Facebook專頁)
郭富城，可以話係靠自己捱過傳媒枝筆、靠自己喺海外闖出名堂、靠自己訓練所以次次個唱都做突破！
所以，唔係佢開15場，仲可以係邊個？
其實郭富城，咪就係香港人精神，入場除咗聽佢愛的呼喚，仲支持緊呢個香港人囉！
(圖片取自郭富城Facebook專頁)
作者：香港茂四
一個娛樂圈茂四，做過前線又做過幕後！
最叻R人專訪，但係又成日推人訪問
說到底打滾咗香港娛樂圈十幾年，深知遊戲規則
＊＊＊＊＊＊＊＊＊＊＊＊＊＊＊＊＊＊＊
Facebook專頁：娛樂定格＿freezentertainment
https://www.facebook.com/%E5%A8%9B%E6%A8%82%E5%AE%9A%E6%A0%BCfreezentertainment-222405268153574/
沒有留言:
張貼留言